తెలంగాణలో వచ్చే ఏడాది నుంచి 10+2 విద్యా విధానం.. ఇంటర్ బోర్డు స్కూల్ ఎడ్యుకేషన్‌లో కీలక మార్పులు !
Telangana 10+2 Education System Changes 2027 : తెలంగాణ రాష్ట్రంలో విద్యా విధానంలో కీలక మార్పులు రాబోతున్నాయి. వచ్చే విద్యా సంవత్సరం నుంచి CBSE, ICSE తరహాలో 10+2 విద్యా విధానాన్ని అమలు చేయాలని రాష్ట్ర ప్రభుత్వం నిర్ణయించింది. ఈ మేరకు ముఖ్యమంత్రి రేవంత్ రెడ్డి విద్యాశాఖ అధికారులతో నిర్వహించిన సమీక్షలో పలు కీలక విషయాలను వెల్లడించారు.
ప్రస్తుతం 10వ తరగతి తర్వాత విద్యార్థులు ఇంటర్మీడియట్ కోసం ప్రత్యేకంగా జూనియర్ కాలేజీల్లో చేరుతున్నారు. అయితే కొత్త విధానం అమల్లోకి వస్తే ఇంటర్మీడియట్ విద్యను పాఠశాల విద్యాశాఖలో విలీనం చేయనున్నారు. దీంతో ఇంటర్ బోర్డు కూడా స్కూల్ ఎడ్యుకేషన్ పరిధిలోకి వచ్చే అవకాశం ఉంది.
తరగతుల విభజన ఎలా ఉంటుంది : కొత్త 10+2 విద్యా విధానంలో విద్యార్థుల చదువును మూడు విభాగాలుగా విభజించనున్నారు.
• ప్రైమరీ విద్య: నర్సరీ నుంచి 4వ తరగతి వరకు.
• సెకండరీ విద్య: 5వ తరగతి నుంచి 8వ తరగతి వరకు.
• సీనియర్ సెకండరీ విద్య: 9వ తరగతి నుంచి 12వ తరగతి వరకు.
ఈ విధానం ద్వారా పాఠశాల స్థాయి నుంచే విద్యార్థులకు క్రమబద్ధమైన విద్య అందించాలనేది ప్రభుత్వ ఆలోచన.
జూనియర్ కాలేజీలు ఉండవా : కొత్త విధానం అమల్లోకి వస్తే 11, 12వ తరగతులకు ప్రత్యేకంగా జూనియర్ కాలేజీలు నిర్వహించే విధానంలో మార్పులు రావచ్చు. ఇంటర్మీడియట్ విద్య కూడా పాఠశాల విద్యలో భాగం కానుంది. దీనివల్ల ప్రత్యేక జూనియర్ కాలేజీల పేరుతో జరిగే అధిక ఫీజుల వసూళ్లకు అడ్డుకట్ట పడే అవకాశం ఉందని భావిస్తున్నారు.
ఇంటర్ ఫస్టియర్ పరీక్షలు రద్దు : కొత్త విద్యా విధానంలో ఇంటర్ ఫస్టియర్ పబ్లిక్ పరీక్షలను రద్దు చేసే ప్రతిపాదన కూడా ఉంది. అయితే దీనికి సంబంధించిన పూర్తి పరీక్షల విధానం, మూల్యాంకన పద్ధతులపై ప్రభుత్వం స్పష్టమైన మార్గదర్శకాలు విడుదల చేయాల్సి ఉంది.
9 నుంచి 12వ తరగతి వరకు ప్రత్యేక విద్య : విద్యార్థులకు భవిష్యత్తులో ఉపయోగపడేలా 9 నుంచి 12వ తరగతి వరకు ప్రత్యేక విద్యను అందుబాటులోకి తీసుకురావాలని ప్రభుత్వం భావిస్తోంది. ముఖ్యంగా 12వ తరగతి నుంచే నైపుణ్యాభివృద్ధికి ప్రాధాన్యత ఇవ్వాలని సీఎం రేవంత్ రెడ్డి సూచించారు.
ఉపాధ్యాయులు, సిబ్బంది పరిస్థితి ఏమిటి : ఈ విధానం అమల్లోకి వస్తే ఇంటర్మీడియట్ కళాశాలల్లో పనిచేస్తున్న అధ్యాపకులు, ఇతర సిబ్బందిని ఎలా సర్దుబాటు చేస్తారనేది ప్రస్తుతం చర్చనీయాంశంగా మారింది. కొత్త విధానం అమలుకు ముందే ప్రభుత్వం దీనిపై స్పష్టత ఇవ్వాల్సి ఉంటుంది.
ఎప్పటి నుంచి అమలు : తెలంగాణలో వచ్చే విద్యా సంవత్సరం నుంచే 10+2 విధానాన్ని అమలు చేయాలని ప్రభుత్వం లక్ష్యంగా పెట్టుకుంది. అయితే పూర్తి విధివిధానాలు, సిబ్బంది సర్దుబాటు, పరీక్షల మార్పులపై అధికారిక ఉత్తర్వులు వెలువడిన తర్వాతే పూర్తి వివరాలు తెలుస్తాయి.
